ഗവര്ണറുടെ ഉപദേശമനുസരിച്ചല്ല സര്ക്കാര് പ്രവര്ത്തിക്കേണ്ടതെന്നും മറിച്ച് മുഖ്യമന്ത്രി തലവനായ മന്ത്രിസഭയുടെ സഹായവും ഉപദേശവും അനുസരിച്ച് ഗവര്ണര് പ്രവര്ത്തിക്കണമെന്നാണ് ഭരണഘടന അസന്നിഗ്ദ്ധമായി രേഖപ്പെടുത്തിയിട്ടുള്ളത്. എന്നാല് സര്ക്കാരിനോട് നിരന്തരം ഏറ്റുമുട്ടുകയും ഭരണപരമായ കാര്യങ്ങളില് ഇടങ്കോലിടുകയും ചെയ്യുന്ന രീതിയാണ് ഗവര്ണര് തുടര്ന്നു വരുന്നത്. ഓര്ഡിനന്സുകളും ബില്ലുകളും ഒപ്പിടാതിരിക്കുക,ഭരണ നടപടികളില് ഇടപെടുക, സര്വ്വകലാശാലകളെ രാഷ്ട്രീയ വേദിയാക്കുക, രാജ് ഭവനുകള് ആര്എസ്എസ് കേന്ദ്രമാക്കുക, ആഡംബര ജീവിതത്തിന് സര്ക്കാരില് സമ്മര്ദ്ദം ചെലുത്തുക, രാഷ്ട്രീയ പ്രസ്താവനകള് നടത്തുക തുടങ്ങിയവയാണ് ബിജെപി സര്ക്കാരിന് കീഴിലുള്ള ഗവര്ണര്മാര് ചെയ്ത് കൊണ്ടിരിക്കുന്നതെന്നും സമ്മേളനം ചൂണ്ടിക്കാട്ടി. ഭരണഘടനയെ ചവിട്ടിമെതിച്ച് കേന്ദ്ര ഭരണകക്ഷികളുടെ ചട്ടുകമായി ഗവര്ണറെ തുടര്ന്നും ഉപയോഗിക്കാനാണ് കേന്ദ്ര സര്ക്കാരിന്റെ നീക്കമെങ്കില് തൊഴിലാളി വര്ഗം നോക്കി നില്ക്കില്ലെന്നും സമ്മേളനം മുന്നറിയിപ്പ് നല്കി.
പ്രതിനിധി സമ്മേളനം സിഐടിയു സംസ്ഥാന പ്രസിഡന്റ് ആനത്തലവട്ടം ആനന്ദന് ഉദ്ഘാടനം ചെയ്തു.ഗവര്ണര് തുമ്മിയാല് തെറിക്കുന്ന മൂക്കല്ല കേരള സര്ക്കാരെന്ന് അദ്ദേഹം പറഞ്ഞു.
സാമ്പത്തികമായി ക്ഷീണിപ്പിച്ച് സര്ക്കാരിനെ വീര്പ്പുമുട്ടിക്കാനാണ് ശ്രമിക്കുന്നതെന്നും അദ്ദേഹം കൂട്ടിച്ചേര്ത്തു. ജില്ലാ പ്രസിഡന്റ് പി കെ ശശി അധ്യക്ഷനായി.എ പ്രഭാകരന് രക്തസാക്ഷി പ്രമേയവും വി സരള അനുശോചന പ്രമേയവും അവതരിപ്പിച്ചു. സ്വാഗത സംഘം ചെയര്പേഴ്സണ് കെ ബിനു മോള് സ്വാഗതം പറഞ്ഞു.
സമ്മേളന നടത്തിപ്പിനുള്ള വിവിധ കമ്മിറ്റികളെ തെരഞ്ഞെടുത്തു.
പ്രമേയം: എസ് ബി രാജു (കണ്വീനര്), എന് ഉണ്ണികൃഷ്ണന്, കെ ബാബു, പിഎന് മോഹനന്, വി എ മുരുകന്,ആര് ജി പിള്ള, ടി കെ നൗഷാദ്, എസ് കൃഷ്ണദാസ്, കെ സുരേഷ്, എന് പി വിനായകകുമാര്, പി ഉണ്ണികൃഷ്ണന്,സി അംബിക
ക്രഡന്ഷ്യല്: വി വി വിജയന് (കണ്വീനര്), കെ ഭാസ്കരന്, എ വി സുരേഷ്, പി എസ് മഹേഷ്,എല് ഇന്ദിര, എന് ഹരിദാസ്
മിനുട്സ്: പത്മിനി ടീച്ചര് (കണ്വീനര്),ടി എം ജമീല, ബി വിജയന്, പി ജി രാംദാസ്, ഇ ചന്ദ്രബാബു എന്നിവര് മിനുട്സ് കമ്മിറ്റി അംഗങ്ങളുമാണ്.
മൂന്ന് ദിവസങ്ങളിലായി നടക്കുന്ന സമ്മേളനത്തില് 360 ഓളം പ്രതിനിധികളാണ് പങ്കെടുക്കുന്നത്. രാവിലെ സമ്മേളന നഗരിയായ എംപി ഓഡിറ്റോറിയത്തില് ജില്ലാ പ്രസിഡന്റ് പികെ ശശി പതാക ഉയര്ത്തി. പ്രവര്ത്തന റിപ്പോര്ട്ട്,വരവ് ചെലവ് കണക്ക് അവതരണം, ഗ്രൂപ്പ് ചര്ച്ച, പൊതു ചര്ച്ച എന്നിവയും നടന്നു. പ്രതിനിധി സമ്മേളനം ഞായറാഴ്ചയും തുടരും. തിങ്കളാഴ്ച വൈകീട്ട് നാലിന് ടി ശിവദാസ മേനോന് നഗറായ കല്ലടി കോളേജ് മൈതാനത്ത് അരലക്ഷം പേര് അണിനിരക്കും മഹാറാലിയും പൊതു സമ്മേളനവും നടക്കും.മുഖ്യമന്ത്രി പിണറായി വിജയന് ഉദ്ഘാടനം ചെയ്യും.