യുവതിക്ക് പ്രസവവേദന അനുഭവപ്പെട്ടതിനെ തുടർന്ന് ബന്ധുക്കള് കനിവ് 108 ആംബുലൻസിന്റെ സേവനം തേടുകയായിരുന്നു. കണ്ട്രോള് റൂമില് നിന്ന് അത്യാഹിത സന്ദേശം മണ്ണാർക്കാട് താലൂക്ക് ആശുപത്രിയിലെ കനിവ് 108 ആംബുലൻസിന് കൈമാറി. ആംബുലൻസ് പൈലറ്റ് കെ. പ്രജിത്ത്, എമർജൻസി മെഡിക്കല് ടെക്നീഷ്യൻ മനു എന്നിവർ ഉടൻ കോളനിയില് എത്തി യുവതിയുമായി ആശുപത്രിയിലേക്ക് തിരിച്ചു.
ഒരു കിലോമീറ്റർ പിന്നിടുന്പോഴേക്കും യുവതിയുടെ ആരോഗ്യനില കൂടുതല് വഷളാവുകയും തുടർന്ന് എമർജൻസി മെഡിക്കല് ടെക്നീഷ്യൻ മനു നടത്തിയ പരിശോധനയില് പ്രസവം എടുക്കാതെ മുന്നോട്ട് പോകുന്നത് അമ്മയ്ക്കും കുഞ്ഞിനും സുരക്ഷിതമല്ല എന്ന് മനസിലാക്കി ആംബുലൻസില് തന്നെ ഇതുവേണ്ട സജ്ജീകരണങ്ങള് ഒരുക്കുകയും ചെയ്തു.
തുടർന്ന് 5.45ന് എമർജൻസി മെഡിക്കല് ടെക്നീഷ്യൻ മനുവിന്റെ പരിചരണത്തില് യുവതി കുഞ്ഞിന് ജന്മം നല്കി. ഉടൻ മനു അമ്മയും കുഞ്ഞുമായുള്ള പൊക്കിള്കൊടി ബന്ധം വേർപ്പെടുത്തി ഇരുവർക്കും വേണ്ട പ്രഥമ ശുശ്രൂഷ നല്കി.
ഉടൻ ഇരുവരെയും ആംബുലൻസ് പൈലറ്റ് പ്രജിത്ത് മണ്ണാർക്കാട് താലൂക്ക് ആശുപത്രിയില് എത്തിച്ചു. അമ്മയും കുഞ്ഞും സുഖമായി ഇരിക്കുന്നതായി ബന്ധുക്കള് അറിയിച്ചു