കോട്ടോപ്പാടം എ.ബി. റോഡ് ജങ്ക്ഷനു സമീപം ഞായറാഴ്ച വൈകീട്ട് മൂന്നേ മുക്കാലോടെയാണ് അപകടമുണ്ടായത്. മണ്ണാർക്കാട്ടുനിന്ന് കോട്ടോപ്പാടം ഭാഗത്തേക്ക് വരികയായിരുന്ന കാറും ബൈക്കും മണ്ണാർക്കാട് ഭാഗത്തേക്ക് പോവുകയായിരുന്ന കാറും തമ്മിലാണ് കൂട്ടിയിടിച്ചത്. പരിക്കേറ്റവരെ വട്ടമ്പലത്തെ സ്വകാര്യ ആശുപത്രിയിൽ പ്രവേശിപ്പിച്ചു. മണ്ണാർക്കാട് പോലീസ് സ്ഥലത്തെത്തി.
ഒരുമാസത്തിനിടെ പാലക്കാട്-കോഴിക്കോട് ദേശീയപാതയിൽ കല്ലടിക്കോടിനും നാട്ടുകല്ലിനും ഇടയിൽ ഇരുപതിലധികം അപകടങ്ങളാണ് നടന്നത്. ഈ കാലയളവിൽ 3 പേരുടെ ജീവൻ നഷ്ടമായി എന്നത് അതീവ ഗൗരവത്തോടെ കാണേണ്ടതാണ്. മഴ സമയങ്ങളിലാണ് ഭൂരിപക്ഷം അപകടങ്ങളും. വാഹനങ്ങളുടെ നിയന്ത്രണം വിടുന്നതും അമിതവേഗവും അശ്രദ്ധയും അപകടങ്ങൾക്ക് കാരണമാകുന്നു. രാത്രിയിൽ റോഡിലെ വെളിച്ചക്കുറവും മഴവെള്ളം റോഡിലൊഴുകുന്നതും അപകടങ്ങൾക്ക് കാരണമാകുന്നതായി പറയുന്നു.