പൊള്ളാച്ചിയിൽ വാഹനമിടിച്ച് മണ്ണാർക്കാട് സ്വദേശി മരിച്ചു

പ്രതീകാത്മക ചിത്രം

മണ്ണാർക്കാട്: പൊള്ളാച്ചിയിൽ വാഹനമിടിച്ച് മണ്ണാർക്കാട് സ്വദേശി മരിച്ചു. ഒപ്പമുണ്ടായിരുന്ന സുഹൃത്തിന് സാരമായി പരിക്കേറ്റു. പയ്യനെടം കമ്പംകോട്ടിൽ പരേതരായ ചന്ദ്രൻ-ദേവയാനി ദമ്പതിമാരുടെ മകൻ വിജയനാണ്‌ (37) മരിച്ചത്. തിങ്കളാഴ്ച രാത്രി പൊള്ളാച്ചി ടൗണിനടുത്തായാണ് അപകടം.

കെട്ടിടനിർമാണജോലിക്കായി സുഹൃത്തുക്കൾക്കൊപ്പം പൊള്ളാച്ചിയിലെത്തിയതായിരുന്നു വിജയൻ. വിജയനും തെങ്കര സ്വദേശിയായ സുഹൃത്തുംകൂടി കടയിലേക്ക് സാധനങ്ങൾ വാങ്ങാൻ പോയപ്പോഴാണ് അപകടം. നടന്നുപോവുകയായിരുന്ന ഇരുവരെയും വാഹനമിടിക്കുകയായിരുന്നു. ഇരുവരെയും പൊള്ളാച്ചിയിലെ ആശുപത്രിയിൽ പ്രവേശിപ്പിച്ചെങ്കിലും ഗുരുതരമായി പരിക്കേറ്റ വിജയനെ രക്ഷിക്കാനായില്ല. ശബരിമലദർശനം കഴിഞ്ഞെത്തിയ വിജയൻ കഴിഞ്ഞദിവസമാണ് ഇവിടേക്ക് ജോലിക്കെത്തിയത്. പോസ്റ്റുമോർട്ടത്തിനുശേഷം മൃതദേഹം ബന്ധുക്കൾക്ക് വിട്ടുകൊടുത്തു. ഭാര്യ: ശ്രുതി. മക്കൾ: അവനിക, ആദിചന്ദ്ര, അദ്വിക.