തിരുവനന്തപുരം: ആക്രി പെറുക്കാനെത്തിയവർ കുട്ടികൾക്ക് മയക്കുമരുന്ന് കലർന്ന പൊടി നൽകിയതായി ആരോപണം. തമിഴ്നാട് സ്വദേശികളായ ആക്രി പെറുക്കുന്ന ഏഴംഗ സംഘത്തിൽപ്പെട്ടവരാണ് കുട്ടികൾക്ക് പൊടി നൽകിയതെന്നാണ് വിവരം. കാട്ടാക്കട പാപ്പനകത്താണ് സംഭവം. പെട്ടിവാങ്ങിയ ശേഷം കുട്ടികൾ മാതാപിതാക്കൾക്ക് നൽകി, ഇതോടെയാണ് സംഭവം പുറത്തുവന്നത്.
പൊടി വെള്ളത്തിൽ ചേർത്ത് കഴിച്ചാൽ നല്ല ഉന്മേഷം ഉണ്ടാകുമെന്ന് പറഞ്ഞാണ് കുട്ടികൾക്ക് പൊടി നൽകിയത്. അതിനു ശേഷം കുട്ടികളുടെ ചിത്രം സംഘം മൊബൈൽ ഫോണിൽ പകർത്തുകയും ചെയ്തു. സംഭവത്തിന് പിന്നാലെ പഞ്ചായത്ത് അംഗത്തിന്റെ നേതൃത്വത്തിൽ പൊലീസിൽ പരാതി നല്‍കി.
