ഉദയർകുന്ന് ഭഗവതിയുടെ വലിയാറാട്ട് ആഘോഷമായി
വാദ്യവിശേഷങ്ങളും വർണ്ണക്കാഴ്ചകളുമൊരുക്കി അരകുർശ്ശി ഉദയർകുന്ന് ഭഗവതിയുടെ വലിയാറാട്ട് ആഘോഷമായി. വലിയാറാട്ട് ദിവസമായ ഇന്നലെ രാവിലെ 8.30 ന് ഭഗവതി ആറാട്ടിനിറങ്ങി. മംഗലാംകുന്ന് അയ്യപ്പൻ ഭഗവതിയുടെ തിടമ്പേറ്റി. മച്ചാട് ഗോപാലകൃഷ്ണൻ, പട്ടാമ്പി കർണനുൾപ്പടെയുള്ള എട്ടോളം
ആനകൾ അയ്യപ്പന് ഇരുവശത്തായി നിരന്നു. വാദ്യമേളങ്ങളും, കോമരങ്ങളും ഭക്തരും അകമ്പടിയായി ഭഗവതിയെ ആറാട്ടിന് ആനയിച്ചു.
കുന്തിപ്പുഴയിൽ ആറാട്ട് കഴിഞ്ഞ് ക്ഷേത്രത്തിലേക്ക്
തിരിച്ചെഴുന്നെള്ളി ക്ഷേത്രമുറ്റത്ത് ഗജവീരൻമാർ അണിനിരന്ന കാഴ്ച ചോതോഹരമായി.
ശേഷം ക്ഷേത്രത്തിലേക്ക് പ്രവേശിച്ച്
ആനകൾ ഭഗവതിയെ തൊഴുത് മടങ്ങി. തുടർന്ന് നടന്ന മേജർസെറ്റ് പഞ്ചവാദ്യം പൂരപ്രേമികളെ ആവേശത്തിലാറാടിച്ചു.
രാത്രി ഒമ്പതിന് ആറാട്ടെഴുന്നള്ളിപ്പും തുടർന്ന് പെരുവനം സതീശൻമാരുടെ നേതൃത്വത്തിൽ 90 ഓളം വാദ്യകലാകാരൻമാർ അണി നിരന്ന പഞ്ചാരിമേളവുമുണ്ടായി. വർണ്ണപകിട്ടാർന്ന കുടമാറ്റവും നടന്നു. തുടർന്ന് ഇടയ്ക്ക പ്രദക്ഷിണം കാഴ്ചവേലി എന്നിവയും നടന്നു