കൂട്ടുകാർക്കൊപ്പം പുഴയിൽ നീന്തുന്നതിനിടെ വിദ്യാർഥി ഒഴുക്കിൽപ്പെട്ട് മുങ്ങി മരിച്ചു. കടലുണ്ടിപ്പുഴയിൽ മലപ്പുറം മറ്റത്തൂർ പാറപ്പുറം കടവിൽ തൂക്കുപാലത്തിന് സമീപമാണ് വിദ്യാർഥി ഒഴുക്കിൽപ്പെട്ടത്. വേങ്ങര അൽ ഇഹ്സാൻ ദഅവ കോളജിലെ വിദ്യാർഥിയായ മണ്ണാർകാട് കാഞ്ഞിരപ്പുഴ സ്വദേശി പാച്ചീരി ജുനൈസ് മകൻ മുഹമ്മദ് റഹീസാണ് മരണപ്പെട്ടത്. ശനിയാഴ്ച വൈകുന്നേരം ആറു മണിയോടെയാണ് സംഭവം. രണ്ട് കൂട്ടുകാർക്കൊപ്പം നീന്തുന്നതിനിടയിൽ ഒഴുക്കിൽ പെടുകയായിരുന്നു. നാട്ടുകാരും മലപ്പുറം ഫയർ ആൻറ് റസ്ക്യു സ്റ്റേഷനിലെ സ്കൂബാ ടീമും ചേർന്ന് തിരച്ചിൽ നടത്തി മൃതദേഹം കണ്ടെടുത്ത് കോട്ടക്കൽ സ്വകാര്യ ആശുപത്രിയിൽ എത്തിച്ചു. മലപ്പുറം സ്റ്റേഷൻ ഓഫീസർ ഇകെ അബ്ദുൾ സലിം രക്ഷാപ്രവർത്തനത്തിന് നേതൃത്വം നൽകി.
