വിവിധയിടങ്ങളിൽ മരം വീണ് ഗതാഗതവും വൈദ്യുതിയും തടസ്സപ്പെട്ടു. പെട്ടിക്കല്ലിൽ ഇന്നലെ മുളങ്കൂട്ടവും തുടർന്ന് മരവും വീണ് ഗൂളിക്കടവ്-ഷോളയൂർ റോഡിൽ ഗതാഗതം പൂർണമായി തടസ്സപ്പെട്ടു. പ്രദേശവാസികൾ മരം വെട്ടിനീക്കി ഗതാഗതം പുനഃസ്ഥാപിച്ചു. താവളം സെഹിയോൻ ധ്യാനകേന്ദ്രത്തിന് സമീപം ഉച്ചയ്ക്ക് 12 മണിയോടെ മരംവീണ് മണ്ണാർക്കാട്-ചിന്നത്തടാകം റോഡിൽ ഗതാഗതം തടസ്സപ്പെട്ടു. ആനവായ്, തുടുക്കി, ഗലസി തുടങ്ങിയ വിദൂര ഊരുകളിലേക്കുള്ള ഭൂഗർഭ കേബിളുകൾ തകരാറിലായതോടെ വൈദ്യുതി നിലച്ചു. റോഡും അപകട ഭീഷണിയിലാണ്. ഷോളയൂരിൽ മൂന്നു ദിവസായി തുടരുന്ന മഴയിൽ മരങ്ങൾവീണ് വൈദ്യുതി തടസ്സപ്പെട്ടു.