കേരളമാകെ ശ്രദ്ധിച്ച രക്ഷാ പ്രവർത്തനങ്ങൾക്ക് ചിറ്റൂർപ്പുഴ സാക്ഷ്യം വഹിച്ചിട്ടും അധിക നാളുകളായിട്ടില്ല. ആലാംകടവ് ഭാഗത്ത് കുളിക്കാനിറങ്ങിയ നാല് മൈസൂരു സ്വദേശികളെ മണിക്കൂറുകളോളം നീണ്ട ശ്രമത്തിനൊടുവിലായിരുന്നു അഗ്നിരക്ഷാസേന കരയ്ക്കെത്തിച്ചത്. ഇതിന്റെ നടുക്കം മാറും മുൻപേ ചിറ്റൂർപ്പുഴയിൽ വീണ്ടും രക്ഷാപ്രവർത്തനം നടന്നു. പന്തെടുക്കാൻ പുഴയിലിറങ്ങി ഒഴുക്കിൽപ്പെട്ട രണ്ട്‌ വിദ്യാർഥികളെ ഏറെ പണിപ്പെട്ടാണ് അഗ്നിരക്ഷാസേന കരയ്ക്കെത്തിച്ചത്.
മഴ കനത്തതോടെ കുളങ്ങളും അണക്കെട്ടുകളുമെല്ലാം നിറഞ്ഞു. പുഴകളും കുത്തിയൊഴുകുന്നുണ്ട്. മുന്നറിയിപ്പുകൾ അവഗണിച്ചും ആളുകൾ ജലാശയങ്ങളിലിറങ്ങുന്നത് അപകടങ്ങൾക്ക് വഴിയൊരുങ്ങുന്നുണ്ടെന്ന് അഗ്നിരക്ഷാസേനാംഗങ്ങൾ പറയുന്നു.
വർഷകാലത്തെ തുടർച്ചയായ ഈ അപകടങ്ങളെല്ലാം വിരൽചൂണ്ടുന്നത് നമ്മുടെ ജലാശങ്ങളുടെ അവസ്ഥയിലേക്കും ആളുകളുടെ ജാഗ്രതക്കുറവിലേക്ക് ആണെന്നതിൽ സംശയമില്ല. അണക്കെട്ട് ഉൾപ്പെടെയുള്ള ജലാശയങ്ങളും വെള്ളച്ചാട്ടവുമെല്ലാം കാണാനാണെത്തുന്നവർ അശ്രദ്ധമായി സെൽഫിയെടുക്കാനും മറ്റും ശ്രമിക്കുന്നതും അപകടങ്ങൾക്ക് വഴിവെക്കുകയാണ്. മുൻകരുതലും ജാഗ്രതയും മാത്രമാണ് ജലാശയ അപകടങ്ങളെ പ്രതിരോധിക്കാനുള്ള ഏറ്റവും നല്ല മാർഗം.