അന്തര്സംസ്ഥാനപാതയായ മണ്ണാര്ക്കാട് -ചിന്നത്തടാകം റോഡില് നെല്ലിപ്പുഴ മുതല് ആനമൂളി വരെയാണ് ആദ്യഘട്ടത്തില് വികസിപ്പിക്കുന്നത്. തെങ്കര മുതല് നെല്ലിപ്പുഴ ദാറുന്നജാത്ത് സ്കൂള് വരെ നാല് കിലോമീറ്ററോളം ദൂരത്തില് ടാറിങ്ങിന് ഉപരിതലമൊരുക്കുകയും ജൂണില് പ്രവൃത്തികള് ആരംഭിക്കുകയും ചെയ്തിരുന്നു. തെങ്കര മുതല് പുഞ്ചക്കോട് വരെയുള്ള ഭാഗത്ത് ടാറിങ് നടത്തിയപ്പോഴേക്കും കാലവര്ഷം ശക്തമായി. ഇതോടെ ബാക്കിയുള്ള ഭാഗത്തെ ടാറിങ് തടസ്സപ്പെട്ടു. ശക്തമായ മഴപെയ്തതോടെ ഉപരിതലം തകര്ന്ന് കുഴികളും രൂപപ്പെട്ടു. ഇതോടെ ഗതാഗതവും ദുഷ്കരമായി. മഴയില്ലാത്തപ്പോള് രൂക്ഷമായ പൊടിശല്ല്യവും യാത്രക്കാര്ക്കും സമീപത്ത് താമസിക്കുന്നവര്ക്കും നേരിടേണ്ടിവന്നു.
യാത്രാക്ലേശം വര്ധിച്ചതോടെ നാട്ടുകാരുടെ പരാതിയെ തുടര്ന്ന് എന്.ഷംസുദ്ദീന് എം.എല്.എ വിളിച്ചുചേര്ത്ത യോഗത്തില് ഒക്ടോബര് 10ന് ടാറിങ് പുനരാരംഭിക്കാമെന്ന് കേരള റോഡ് ഫണ്ട് ബോര്ഡ് അധികൃതര് അറിയിച്ചിരുന്നു. എന്നാല് മഴ ശക്തമായതിനാല് ടാറിങ് നടത്താന് സാധിച്ചില്ല. ഇതോടെ പരാതികളും പ്രതിഷേധവും ഉയര്ന്നു. തുടര്ന്നാണ് കഴിഞ്ഞദിവസം മുതല് ടാറിങ് ആരംഭിച്ചത്. മഴ പ്രതികൂലമായില്ലെങ്കില് ഈ ആഴ്ച തന്നെ ടാറിങ് പൂര്ത്തീകരിക്കുമെന്ന് അധികൃതര് പറയുന്നു. തെങ്കരയില് നിന്നും ആനമൂളി വരെയുള്ള ഭാഗത്തെ ടാറിങും വൈകാതെ തന്നെ ആരംഭിക്കാനാണ് ശ്രമം.